السكوت علامة الرضى....!حكمة
مين فينا مسمعش الكلمة دى... السكوت علامة الرضى بنسمعاها كتير فى الافلام.. المسلسلات.. أولما يجيى ابوك ويسألك بعد نتيجة الثانوية ها هندسة ولا طب ؟ فتسكت ويقولك على بركة الله...السكوت علامة الرضى ..... الخيرة فيما اختاره الله ..وينزل معاك يقدملك الرغبات وبعدين يجيلك يا عم جواب الترشيح وتفتحه وانت مبتسم الابتسامة البلهاء دى اللى فيها خوف وكسوف وفرحة دى وأووبااااااااا أيه دا !!!!! تتفاجأ بإن تجيلك تجارة القاهرة ! وبعدين تبص على الجواب تانى .. الله ايه دا هو فى هزار فى الحاجات دى ولا ايه !؟ تتأكد من الأسم تانى... طيب العنوان...الله دا كله تمام طيب ازاى تجارة وانا اللى جايب 98% وقاعدة امي تتفشخر بيا قدام الجيران و اشتريت البالطو وأمى وجعة دماغى ليل نهار يا دكتور تعالى ويادكتور روح....أكيد فى حاجة غلط ...فوووووق يا برنس انت اساساً ما اخترتش دا ابوك اللى اختار ! إيه انت ناسى ولا ايه !؟انت بس روحت معاه لحد مكتب التنسيق وسيبته يختارلك مستقبلك انت بقرره هوا, انت ماحطتش اى رغبة بإيدك هو شاف انك أخرك كده اخرك تجارة..طيب ازاى دا سألنى فى الأول وهوا اللى قالى..هندسة ولا طب طيب ليه كده ..هو شاف انه دفع كتير دروس وكتب وبلاوى سودا .. صبر كتير(من وجهة نظره) ..مش شايف انك ناجح برغم مجهودك برغم مجموعك.شاف ان قدراتك ماتسمحش غير بكده ..
دا بالظبط اللى بيحصل فى بلدنا دلوقتى يقولك عايز رئيس منتخب من عونية حاضر....وعندك واحد رئيس لو سمح وبعدين يقولك خد يا عم الرئيس اللى انت واجع دماغنا بيه اهو لأ وأيه !! خد بالك دا مش أى رئيس لامؤخذه دا رئيس منتخب ها بس معلش هيبقى منزوع الدسم.. قصدى منزوع الصلاحيات .. بلدنا داخلة على مرحلة فارقة...الناس فى الشارع بتحتفل بفوز مرسي وشفيق أنصاره بيعيطو فى الشوارع والمقارات الأنتخابية بتاعته برغم ان لسه النتجية مش رسمية ...المجلس العسكرى بيصدر قوانين جديدة ومجلس الشعب اتحل من كام يوم وإعلان دستورى مكملاَ او تقدر تقول عليه إعلان دستورى (منغص).. حاجات كتير بتحصل فى وقت واحد تخلى دماغك تنفجر من كترالتفكير فى المستقبل والحاضر ..والسوأل اللى دايما يخرم دماغى هو.. طيب فرحة الناس دى بإن مبارك مش هيرجع تانى فى بلوفر شفيق(مش فرحة بفوز مرسي بس) معقولة الاخوان ممكن يغدرو بيها ! ممكن الاخوان بعد مرسي ماكسب يلعبو معانا اللعبة القذرة ويبيعو احلامنا..!؟ أسائلة كتيييييير اوهام وافكار بتيجى فى راسي ..بس فى وسط كل دا بيجى فى راسي منظر الشاب اللى وقف فى شارع القصر العينى قدام سيارة الشرطة اللى كانت بترش ماية وقدر انه يوقفها برغم ان الظابط كان ممكن يدوس عليه وبكل سهولة (عملوها كتير قبل كده)واقف و بكل ثقة وماخفش من الموت ..ايوة لازم تحضرنى الصورة دى دلوقتى..بتدينى قوةفظيعة بتدينى امل اننا مش هننكسر ابداً قدام اى حد...خلعنا مبارك وبقى عبرة لكل اللى بعده مهما كان هو مش هيقدر يصمد قدام ثقتنا فى الله وثقاتنافى نفسنا ..خليك واثق انك الأقوى انا من انهرده هزرع الفكرةدى فى نفسي.. ولامؤخذة مش هيخوفنى لا إعلان دستورى مكملا.. ولا صعود فلول ولا إسلاميين ولا اى حد...انا مش هاخاف تانى ..خلاص انا غيرت الكوكب
وخليك فاكر ان السكوت علامة الرضى !
